ماهر طلبه
الخياط


 

 إذا كان دا أخر قماش ممكن يتعمل فى الدنيا فلازم إللى يلبسوه يكونوا أفضل واحد وواحدة فى الدنيا دى

 .. وعلى كده رفض كل العروض إللى اتقدمت له وكان وراها المال ، لكن لما السلطان طلبه ، ووقفه قدامه ،  وعرض عليه حياته مقابل القماشه الرجالى ، مالقاش – الخياط- وراه حيطه يسند عليها فوقع وخد السلطان القماشه الرجالى إللى دعا الخياط ربنا إنها تتحول لشوك يتعذب بيها السلطان أخر واحد فى الدنيا كان يستحقها ، لكن لما السلطانة عرضت عليه – وهى نايمه على سريرها الكبير- كنزها الثمين مقابل حتة القماش الحريمى ، هو أصر أنّه يرفض ، وقال لها المقولة إللى بعد كده كررتها كتب التاريخ واتخذتها الجرائد اليومية شعار لها .." أنا ممكن أشترى عمرى لكن مش ممكن أبدا أقدر أبيع قلبى .."..حتى لما السلطان – إللى كان بيتمنى أنّه يرفض علشان يحتفظ بالحريم من غير هدوم – اتوسط بينهم ، وهدده وحط رقبته تحت حد السيف ، وماكنش بينه وبين الموت إلا شعره رفض وقال للسلطان .. "أنا اشتريت حياتى منك بالقماشة الرجالى ، لكن لو بعت القماشة الحريمى أبقى ببيع قلبى ودى حاجه ماقدرش عليها ..." ..

 ساعتها حمد السلطان ربنا ووقف على الحياد ...

كل حريم البلد عدت عليه .. كل واحدة عرضت عليه حاجه م إللى عندها .. إللى المال .. وإللى الجمال .. وإللى خفة الدم .. وإللى .. وإللى ... شاف إللى كان مايحلمش يشوفه وسمع إللى كان مايحلمش يسمعه ولمس إللى عمره مالمسه .. لكن عمره ما رجع ولا حتى فكر يرجع عن قراره .. "إللى هتاخد القماشة هى إللى هتاخد قلبى .."

ليه الزمن فى حكاياتنا دايما سريع كده مااعرفش لكن المهم إن زمن طويل جدا عدا ... الناس نسيته .. ستات البلد مابقتش تفرق معاهم إللى كانوا فى الأول مكسوفين من عرى الدراع وعرى الرجل النهارده ماشيين من غير هدوم ومش حاسين بأى حرج كأن هو دا العادى الطبيعى لكن هو ميأس يمكن استغرب شوية لما شاف أول واحدة معديه قدامه من غير هدوم ... يمكن صعبت عليه واحدة كان لسه عندها حتة خجل من عريها ... يمكن بهره منظر وسحره وحرك جواه غريزة قربت تموت .. لكن عمر إيده ما قربت م القماشة لحد ما جت هى ... عقلة صباع .. قصيرة جدا زى البنفسجة .. بريئة جدا زى الشمس .. جميلة جدا زى الليل .. ازاى دخلت حكايتنا مااعرفش .. فجأة لقاها قدامه .. كانت أول وأخر واحدة تزور محله من سنين طويلة .. كانت أول وأخر واحدة تحتفظ باللبس لحد دلوقتى .. جت تسأل على قماش .. كأنها مش عايشه فى الدنيا .. " إيه .. كنت فين .. انت مش شايفه الناس إزاى ماشيين ".... كانت مخبيه عينيها بايدها ... "قد إيه هيبقى جميل عليكى القماش .." .. مد إيده إللى كانت مربوطة لقلبه وبدأ يقيس الطول والعرض .. الكتف والصدر ... "ياه على قدك بالظبط ..".. خرج القماش نفض من عليه التراب .. قص وفصل .. لبست وخرجت م المحل ..

 حبها ؟.. آه حبها ماينكرش .. واتمناها ؟.. آه اتمناها برضه ماينكرش .. هى كمان كان باين عليها إنها موافقه ، وإلا ليه جت تطلب القماشة وهى عارفه الشرط ، وليه ضحكت لما رمى ناحيتها عينيه ،وليه وهى المكسوفة من كل الناس رمت الهدوم القديمة قدامه ووقفت ملط وهو بيناولها توبها الجديد ...؟؟؟؟؟؟؟؟؟

لبست وخرجت م المحل .. قد إيه كانت غريبة وسط كل سكان البلد العريانين .. إتلم عليها ناس كثير .. أول مره من سنين يشوفوا هدوم ... لدرجة إنّهم افتكروا إنّ الهدوم مخلوقة للسلطان بس .. السلطان نفسه كان مقتنع إنّه سلطان علشان لابس هدوم فلما سمع من الناس إنّ فيه حد تانى لابس اتغير دمه .. حس إنّ سلطانه بيضيع .. لازم يحكم المسائل .. جمع كل مستشارى السلطنه فكر وفكروا وأخيرا اتفقوا على رأى ....

.... عارفين أنا متهيألى الرأى ده مش ممكن يكون فى صالح الخياط .. من غير ما أعرف هما قرروا إيه لكن بالمخ كده .. متهيألى إنّ السلطان لازم له سلطانه بهدوم يبقى لازم يخطف "عقلة الصباع " – يعنى يخطف قلب الخياط – يتجوزها .. طب منين يضمن السلطان – إللى التاريخ ضاع منه- إنّ الخياط بكره مايفصلش توب جديد لحد جديد فيصبح إللى ليهم الحق فى السلطنه ثلاثة وأربعة وخمسة .. يبقى لازم الخياط يموت ......

"يموت ؟!!!!!!!!".....

 تصوروا ... الخياط الطيب إللى كان كل إللى يملكه من حطام الدنيا حتتين قماش اشترى عمره بواحدة منهم ... الثانية - إللى فيها قلبه – ضيعت الباقى منه ...

*